Kaapstad. – ’n Reuse-klasaksiegeding teen die vier groot Suid-Afrikaanse handelsbanke en die Reserwebank is in die Johannesburgse hooggeregshof ingestel oor die “bedrieglike misbruik van die regstelsel”.

Die geding is ingestel deur meer as 115 000 individue onder die vaandel van die organisasie The New Economic Rights Alliance (NewERA). 

Die dagvaarding is volgens NewERA reeds beteken aan Absa, FirstRand, Nedbank, Standard Bank en die Reserwebank.

NewERA sal in die hofverrigtinge verteenwoordig word deur sy uitvoerende direkteur, Colin Cundill. 

NewERA het twee jaar aan navorsing bestee voordat die dagvaarding gister uitgereik is. 

In die besonderhede van hul eis maak die eisers dit duidelik dat hulle nie geld van enige bank wil hê nie, maar ’n verklarende bevel van die hooggeregshof vra waarin die handelsbanke verbied word om voort te gaan met eise teen die publiek omdat die werkwyse van die banke met geld van die publiek ongrondwetlik is. 

Dit moet dus deur die parlement hersien en reggestel word.

Een van die aspekte waaroor NewERA besonder sterk voel, is dat nie een van die banke locus standi (die reg om ’n geding te voer) in hul hofsake teen die publiek het nie, onder meer omdat handelsbanke van bates op sy boeke (soos lenings deur die publiek) kan omskakel in bemarkbare entiteite wat aan onder meer beleggers verkoop word.

Dit beteken dat die eise wat banke weens die wanbetaling van lenings teen lede van die publiek instel, onregmatig gedoen word omdat die betrokke lening nie meer die eiendom van die bank is nie, maar wel van die beleggers wat die entiteite by die bank gekoop het.

Omdat banke nie in die howe melding daarvan maak dat die betrokke lening waaroor hulle dagvaar, in werklikheid verkoop is nie, kom dit neer op bedrieglike misbruik van die regspleging wat daartoe bydra dat die publiek op groot skaal onregmatig van hul eiendom ontneem word as die bank in sy eis slaag, voer NewERA aan.

NewERA sê in die omstandighede word die publiek boonop om die bos gelei omdat banke hulle nie inlig dat hul lening aan ander instansies verkoop is nie en dat die bank dus regtens nie meer ’n eis teen hulle kan instel nie. 

Die hele stelsel waarvolgens banke met die publiek se geld werk, is eweneens onregmatig, onder meer omdat banke deur hul werkwyse kunsmatig geld skep.

Die vyf banke sal nou ’n geleentheid kry om in hofstukke op die bewerings van NewERA te antwoord. 

_________________________________________________________________________________________________________

* Disclaimer *
This email and any accompanying attachments may contain confidential and proprietary information and was meant to be read by the intended recipient(s) only. This information is private and protected by law and, accordingly, if you are not the intended recipient, you are

* requested to delete this entire communication immediately
* required to notify the sender of this e mail immediately and
* notified that any disclosure, copying or distribution of or taking any action based on this information is prohibited.

The sender does not accept any liability or responsibility for any interception, corruption, destruction, loss, late arrival or incompleteness of or tampering or interference with any of the information contained in this email (or its attachments) or for its incorrect delivery or non-delivery for whatsoever reason.

AO COmmunications Pty(Ltd) is a registered Telecommunications company.